Descripción de la Exposición Nos últimos anos do século XIX prodúcense unha serie de avances técnicos no campo da fotografía como son a produción industrial de papeis de xelatinobromuro, así como a mellora das cámaras de fotos, que se fan máis sinxelas e manexables. Así mesmo, abarátase o seu prezo, circunstancia que propicia que se xeneralice o seu uso dando lugar a un novo tipo de fotógrafo 'afeccionado', diferente ao 'de gabinete'. Salvador Aurelio Castro Soto Freire, nacido en Lugo no ano 1869 e farmacéutico de profesión, pertence a esta nova clase de fotógrafos que ocupa os seus momentos de ocio paseando pola cidade e viaxando pola provincia coa súa cámara ás costas, captando todas esas imaxes que xa forman parte da nosa memoria. Home moi interesado polos avances da súa época, a súa desafogada posición económica permitiralle adquirir todo aquel dispositivo innovador que se poña ao seu alcance, dende unha cámara fotográfica ou un verascopio até unha máquina rexistradora. Pero Salvador Castro Soto Freire era, ante todo, un namorado de Lugo, a súa cidade, e participaba activamente de todos os acontecementos que nela se producían. Así, a súa cámara de fotos será unha ferramenta indispensábel para capturar toda unha serie de cambios e acontecementos que se producen en Lugo nos últimos anos do século XIX e os primeiros do século XX. Ao mesmo tempo que realiza todas estas imaxes que nos deixou en herdanza, Castro Freire escribe e recompila datos de feitos pasados e tamén do seu presente, que aglutina nun interesante traballo que será publicado en 1951, un ano antes da súa morte, nunha edición custeada polo Colexio de Farmacéuticos de Lugo baixo o título, Lugo y sus hombres. Ensayo de síntesis histórica. O arquivo componse de duascentas trinta e tres copias fotográficas en papel, catorce negativos de cristal e un estereoscopio con corenta e dúas imaxes dobres en cristal, e a súa importancia radica en que todo ese conxunto é orixinal. Os coñecementos químicos de Salvador Castro Freire quedan patentes na variedade de técnicas que emprega, tanto nas emulsións coma nos revelados realizados por el mesmo no primeiro piso da súa botica situada na rúa de San Pedro. Castro Freire empregará maioritariamente, xelatinas de prata ao clorobromuro, aínda que tamén hai algunha copia ao papel citrato e unicamente unha copia á albumina. Nos poucos casos que aparecen asinadas, a rúbrica aparece invertida. Algunhas destas imaxes serviranlle de base para a realización de postais, para as que emprega as mesmas técnicas fotográficas, ou ben procedementos de imprenta como a colotipia. Xunto cos negativos de cristal e as copias en papel presentamos un estereoscopio, que era propiedade do fotógrafo, co que se poden contemplar as corenta e dúas imaxes dobres de cristal de forma tridimensional. Esta exposición revélase como unha ocasión única e excepcional para ver a colección de Salvador Castro Soto Freire do Museo Provincial de Lugo, xa que a fraxilidade dos seus materiais impide unha exhibición prolongada no tempo.
Exposición. 19 nov de 2024 - 02 mar de 2025 / Museo Nacional del Prado / Madrid, España
Formación. 23 nov de 2024 - 29 nov de 2024 / Museo Nacional Centro de Arte Reina Sofía (MNCARS) / Madrid, España
