-------------------------------------------------------

-------------------------------------------------------

Logo das exposicións dedicadas a Francisco Asorey no Pazo de Torrado, en Cambados, e na Fundación Torrente Ballester, en Santiago de Compostela, co gallo dos 50 anos do seu pasamento, e acompañando o regreso ao MPLugo da 'Ofrenda e San Ramón' e de 'San Francisco', gozamos do privilexio de comunicar aos lucenses, e aos que nos visiten nestas datas, que teñen unha oportunidade única de contemplar por uns días dúas obras máis emblemáticas do grandísimo escultor galego: 'Nai de dor' e 'O Tesouro'. Poucas ocasións coma esta para gozar de tan extraordinarias pezas pertencentes a coleccionistas privados.

Francisco Asorey González (Cambados (Pontevedra) 1889- Santiago de Compostela 1961) é un dos escultores galegos máis representativos do século XX, e con motivo do 50 aniversario do seu pasamento e da declaración do ano 2011 como 'Ano Asorey', o ... Museo de Lugo súmase a esta celebración achegando durante o mes de decembro dúas obras escultóricas en madeira que complementan a oferta existente e dialogan coas expostas a cotío nesta institución: San Francisco e A ofrenda a san Ramón.

As pezas que presentamos, realizadas no seu taller de Caramoniña, en Santiago de Compostela, corresponden á súa etapa de madurez, que se inaugura coa obra titulada Picariña, seguida por toda unha serie de tallas policromadas nas que a protagonista é a muller galega, verdadeiras encarnacións da nosa terra.

As obras que presentamos teñen unhas características comúns: o hieratismo, a frontalidade e a rotundidade, herdeiras dalgunha forma da tradición románica, tratadas con naturalismo, ao que tamén contribúe unha rica policromía aplicada sutilmente, sen enmascarar as calidades da madeira coa que se realizan.